टॉप पब्लिक न्यूज – : वडारवाडीत आपल्या टोळीचे वर्चस्व राहण्यासाठी गंभीर गुन्हे करणार्‍या सराईत गुन्हेगाराला तडीपार केले होते. असे असतानाही पुणे शहरात प्रवेश केलेल्या तडीपार गुंडाला चतु:श्रृंगी पोलिसांनी पकडले. त्याची झडती घेतली असता त्याच्याकडे गावठी कट्टा व २ जिवंत काडतुसे आढळून आली.
अजय चंद्रकांत विटकर Ajay Chandrakant Vitkar (वय २३, रा. हरिहरेश्वर सोसायटीसमोर, जुनी वडारवाडी) असे या गुन्हेगाराचे नाव आहे. याबाबत पोलीस हवालदार बाबासाहेब पांडुरंग दांगडे यांनी चतु:श्रृंगी पोलीस ठाण्यात फिर्याद दिली आहे.
अजय विटकर याची टोळी असून तो टोळीप्रमुख आहे. त्याच्याविरुद्ध खुनाचा प्रयत्न, जबरी चोरी, मारामारी, जीवे मारण्याची धमकी देणे, बेकायदा शस्त्र बाळगणे, वाहनांची तोडफोड करुन नुकसान करणे असे गंभीर गुन्हे दाखल आहेत. आपल्या टोळीचे वर्चस्व रहावे, यासाठी परिसरात दहशत माजवित असल्याने २०२२ मध्ये त्याच्यासह टोळीवर मोक्का अंतर्गत कारवाई करण्यात आली होती. मोक्कातून त्याची गेल्या वर्षी सुटला झाली. त्यानंतरही त्याने आपले गुन्हेगारी कृत्ये चालूच ठेवल्याने त्याला पोलीस उपायुक्त हिम्मत जाधव यांनी नोव्हेबर २०२४ मध्ये पुणे शहर, पिंपरी चिंचवड व पुणे जिल्ह्यातून तडीपार केले होते.
चतु:श्रृंगी पोलीस शनिवारी रात्री पेट्रोलिंग करत असताना त्यांना तडीपार गुंड अजय विटकर हा पुन्हा वडारवाडीमध्ये आला असल्याची माहिती मिळाली. त्यानुसार पोलिसांनी वडारवाडी सापळा रचून पठाण गल्लीत अजय विटकर याला पकडले. त्याची झडती घेतली असता त्याच्याकडे एक गावठी कट्टा व दोन जिवंत काडतुसे आढळून आली. पोलिसांनी त्याच्यावर आर्म अ‍ॅक्टखाली गुन्हा दाखल करुन त्याला अटक केली.
ही कारवाई पोलीस उपायुक्त हिम्मत जाधव, वरिष्ठ पोलीस निरीक्षक विजयानंद पाटील यांच्या मार्गदर्शनासाठी करण्यात आली. सहायक पोलीस निरीक्षक नरेंद्र पाटील तपास करीत आहेत.
टॉप पब्लिक न्यूज रिपोर्टर -: प्रशांत
.jpg)
